O Nanicowaay Ko Pangcah A Tamdaw(2)
(Pado^do to sa’ayaway-Satapangan no Pangcah i Taywan)
Nikawarira, ira ko cudad to misaheciay to pakayniay i ma’alolay a malikakaay naitini i Kalolin a kasakanatal. O Mikeronesiya a finacadan ko maro ’ay toya kanatal.
O mihecaan noya nika ‘alol a tayni i Taywan i, maedeng i ’ayaw no tolo patek ano eca i sepat a patek a niheca ko nika ‘alol nonini a malikakaay saan.
O demak no nika 'alol noya tatosaan i, o namifotingay cangra i riyar. Nawhani, tata’ang ko nika kerah no riyar toya romi’ad saka, tayra i riyar a ma’emin ko finawlan a mipodpod to foting nika kerahan. Caay to ko karihic ato romaroma ko mitatoyan nangra. Tona adihay ko foting saka, o dodang (o pitoptopan / fangfnag to panay) ko nialaan nangta a miparo itira to foting.
O nini a tatosaay a malikaka i, tona awaay ko mama ato ina nangra saka, caay ka fana’ tonini a demak no finawlan a miala to foting. Paka’araw koya fafahiyan a kaka to nika pinokay to no finawlan a matomesto ko dodang to foting. Saka, tayra sato cangra a tatosa a malikaka a mifoting. Itira sato i ra:ay to, caay ka tangasa no tamtamdaw cangra a mifoting. Itiya i, masatatosa to cangra a malikaka. Itiya i, fahal sato ko pileno no riyar ato ira haca ko tata’angay a tapelik. Saka, yo irato konini a tata’angay tapelik i, ma’alol cangra a mataroh a talasifo’ no riyar. Tona awaay ko mitatoyan nangra to sa’iwas saka, kamayen nangra ko pi’iwas, Caay ka filo nangra. Naw ahani tata’ang to ko fali a micukeroh a mi’alol i cangraay. Saka, pawpaw sato cangra a ma’lol. Itiya i, malonen aca, mafaliyos ko kitakit ato riyar a ma^min.
Pasa’amis ko nika ‘alol nangra. Yo tangasa to cangra i Taywan i, pakapinaay to romi’ad itiya. Saka, tangasa to cangra i Langasan hananay a lotok. Nawhani manaop no nanom ko Taywan itiya. Itiya i caayho ka tadasakaying,caayho ka tadasakapah ko tireng nangra a malikaka. Itira saho cangra i lotok a maro’. Nanoya terep sato ko faliyos, makerah ko riyar. Saka, mali- kelong cangra a tayra i masadafdafay itira to ko pisanga to malo kamaro- ’an nangra a talo’an.
Cimihecahecan to cangra itira. Saka, sowalen no fafahiyan a kaka ko safa to sakararamodaw nangra. Do^do sato ko safa to sowal no kaka. Saka, raramod sato cangra. Onini ko saka o ina ko cacitodong to demak no loma’. Onini ko saka o fa’inayan ko mamikadafo i fafahiyan. O ngangan nonini a malikakaay i, ci Nakaw aci Sera. O kimad no romaroma a Pangcah i, ci Doci aci Rarakan saan.
(Nai "O 'Orip No 'Amis" a cudad-'Afo Apak. komitiliday )
Tipus Koyo 2014.03.12
|
沒有留言:
張貼留言